Fiach Drive-in-Dráma

Fiach Drive-in-Dráma

Cur síos
DRIVE-IN-DRÁMA

FIACH 

Dráma nua le Philip Doherty

Ionad: Baile na hAbhann, Conamara, Co. na Gaillimhe, H91 A9W8

Dátaí:  12-22 Lúnasa 2020

Ticéidí: €25 (ar charr)

Ticéidí: https://www.eventbrite.com/o/fibin-theatre-company-30506938118

Aisteoirí:
Fionnuala Flaherty –  IFFL AWARD: BEST ACTRESS
Dara Devaney  – IFTA AWARD: BEST ACTOR

‘Téann Garda reibiliúnach sa tóir ar mhaistín áitiúil agus leanann isteach sa Domhan Thíos é’.

Airíonn muid ar fad uainn an saol mar a bhí: An fhéile cheoil sin, scannán sa bpictiúrlann, an seó san amharclann; an gliondar a bhaineann leis an tsiamsaíocht bheo. Bheul, tá réiteach ag Fíbín ar an scéal. Tiomáin amach chuig fiántas Chonamara agus bí i láthair ag seó beo a thabharfaidh ar aistear grinn, drámaíochta agus iontais tú. Beidh do chroí i do bhéal ag Fiach agus an t-atmaisféar céanna agus a bheadh ag ceolchoirm rac-cheoil ann, tú faoi gheasa ag draíocht na scannánaíochta agus ag dlúthchaidreamh an dráma raidió. Gach rud a d’airigh tú uait le tamall…beidh sé ann.

Tá ríméad ar Fíbín, i gcomhpháirt leis An Taibhdhearc, siamsaíocht bheo a chur ar fáil dár lucht féachana i suíomh ar leith atá sábháilte ó COVID. Tá muid an-bhuíoch chomh maith a bheith in ann obair a chur ar fáil d’ealaíontóirí cruthaitheacha, go háitiúil agus go náisiúnta, le linn na tréimhse corraithí seo. Seó é Fiach ar féidir le cleachtóirí amharclannaíochta, ó aisteoirí, go dearthóirí agus tógálaithe seit a bheith ag comhoibriú lena chéile arís agus seó beó á chruthú do lucht féachana beo. Fonn a níos fiach – leanfaidh muid ar aghaidh!!

Ag trácht ar an Léiriú, dúirt Stiúrthóir Ealaíne Fíbín, Philip Doherty:

‘Theastaigh ó Fíbín tabhairt faoin dúshlán agus amharclannaíocht a bheadh sábháilte ach éirí croí inti a chruthú. Bhí orainn a bheith ag smaoineamh lasmuigh den bhosca, agus más tada é, tá sé i ndiaidh brú a chur orainn a bheith níos cruthaithí agus smaointí nua á hceapadh don léiriú. Tá ríméad orainn go bhfuil muid in ann cuireadh a thabhairt do lucht féachana chuig ‘Fiach’, ár seó amharclannaíochta drive-in, áit ar féidir le daoine taitneamh a bhaint as a bheith ag féachaint ar scéal i dteannta a chéile in atmaisféar iontach’.

Is é Fiach an chéad dráma drive-in Gaeilge in Éirinn agus ba mhaith le Fíbín aitheantas a thabhairt do thacaíocht leanúnach Ealaín na Gaeltachta, Foras na Gaeilge agus an Chomhairle Ealaíon agus Fiach á stáitsiú.

Faigh an Nuacht is Déanaí ó nuachtlitir Fíbín